DEPO PROVERA - INJEKSIONI

Çka është?

Depo/injeksionet( injeksioni ) është emër i shkurtër për Depo Provera, që merret 4 herë në vit (çdo 12 javë) për të parandaluar shtatzënësinë (e padëshiruar). Për shkak se depo epet përmes injektimit shumë femra e quajnë “injeksion”. Depo përmban hormone që normalisht gjenden në trupin e femrës.

FAKT: Për më shumë se 30 vite miliona femra në gjithë botën përdorin Depo Provera.

Si të filloni me depo provera

Për të pasur një fillim pa brenga me Depo-n mëso disa gjëra për të:

-         Injeksioni merret në krah apo kofshë çdo 12 javë. Për shumicën e femrave injeksioni është i padhembshëm

-         Nëse e dini se nuk do mund të merrni injeksionin në terminin e caktuar, atëherë ju mund ta merrni atë 2 javë përpara (javën e 10)

-         Nëse e merrni injeksionin gjatë 5 ditëve të para të ciklit menstrual do të keni mbrojtje të menjëhershme nga shtatzënësia. Nëse e merrni injeksionin në ditët tjera përveç 5 ditëve të para, atëherë duhet të përdorni edhe një metodë shtesë për 7 ditë, p.sh. kondoma.

-         Injeksioni epet nga profesionistët e trajnuar mjekësor, mjek ose infermiere

MBANI MEND:

Injeksioni duhet të merret me rregull çdo 12 javë

Çka presim:

Efektet më të shpeshta anësore

Ju mund të keni efekte anësore gjatë përdorimit të Depo-s. Zakonisht këto efekte anësore do të zhduken 6-12 muajt e parë të përdorimit, atëherë kur trupi juaj do adaptohet me të.

Gjakderdhjet e parregullta

Gjatë 6-12 muajve të parë të përdorimit të Depo-s, ju mund të keni menstruacione më të gjata dhe më të rënda se zakonisht, gjakderdhje mes ciklit apo mund të mos keni gjakderdhje fare.

Ndryshimet në cikël

Pasi të keni filluar të përdorni Depo-n, ju do të vëreni se menstruacionet vijnë gjithnjë e më rrallë. Disa femra e pëlqejnë këtë. Disa femra brengosen se nuk kanë menstruacione. Shumica e femrave ndihen më mirë kur e dinë se çfarë ndryshimesh do të ndodhin.

-         Pas 6-12 muajsh: femrave iu mungon një cikël, apo nuk kanë menstruacione

-         Pas 1 apo më shumë vitesh: 50% e femrave nuk kanë menstruacione

-         Pas 2 apo më shumë vitesh: Shumica e femrave nuk do kenë menstruacione

-         Pas ndalimit të përdorimit të Depo-s: Disa femra fillojnë të kenë menstruacione menjëherë. Disa femrave iu nevojitet 1 vit që t’iu kthehen menstruacionet e rregullta.

Rritja e peshës

 Rreth 70% e femrave shtojnë rreth 1 kg peshë gjatë vitit të parë të përdorimit dhe rreth 2 kg pas vitit të dytë të përdorimit. Kjo ndodh për shkak se Depo e rritë ndjenjën e urisë dhe poashtu mund të ndjeheni më të lodhura. Është me rëndësi të përmendet poashtu se rreth 20% e femrave humbin peshë, ndërsa 10% nuk kanë kurrfarë ndryshimi. Nëse jeni të brengosura për rritjen e peshës me Depo, zgjedh ushqim të shëndetshëm dhe bëj ushtrime rregullisht.

Efektet anësore më të rralla

    Ndryshimi i disponimit

-         Lodhja

-         Kokëdhembja

-         Tharja e vagjinës

-         Rritja apo zvogëlimi i dëshirës për marrëdhënie seksuale

-         Rënia e flokëve

Për shkak se Depo është një metodë afatgjate e parandalimit të shtatzënësisë (një injeksion në 12 javë), efektet anësore nuk mund të largohen menjëherë. Zakonisht duhet të prisni derisa të kaloj efekti i injeksionit. Nëse ndjeheni se këto efekte anësore bëhen të padurueshme duhet të kontaktoni mjekun apo infermieren.

Çka të bëni nëse keni probleme

Depo është një metodë mjaft e sigurt për të parandaluar shtatzënësinë. Shumë rrallë femrat mund të kenë reaksione negative në të, si:  

-         Gjakderdhje të madhe nga vagjina

-         Kokë dhembje të shpeshta dhe të forta

-         Dhembje të madhe në bark

-         Hmbje të disponimit

Nëse do të keni ndonjërën nga këto simptoma, kontakto mjekun apo infermieren!

Përparësitë e përdorimit Depo-s

Për më shumë se 30 vite, femrat në gjithë botën përdorin Depo-n për të parandaluar shtatzënësinë. Disa nga arsyet pse femrat e përdorin Depo-n:

-         Shumë efektive (më efektive se pilulat)

-         Afatgjate – vetëm 4 herë në vit

-         Pas 6-12 muajsh, menstruacione më të lehta apo nuk ka fare menstruacione

-         S’ka pilula çdo ditë

-         Intime (askush nuk mund të vërej)

-         Të sigurta për femrat që nuk guxojnë të përdorin estrogjene (hormon që ndodhet në pilulat kontraceptive)

FAKT: Depo mund të ofroj mbrojtje nga kanceri i murit të mitrës dhe vezoreve.

Çka duhet të dini

Përderisa depo vazhdon të bëhet një zgjedhje e njohur për shumë femra, nuk është më e mira për të gjitha. Disa shpjegime më poshtë iu bëjnë të kuptoni pse Depo nuk është zgjidhje e mirë për disa femra:

-         Depo nuk mbron nga HIV-i apo infeksionet tjera me bartje seksuale. Ju duhet të përdorni kondoma nëse keni nevojë për këtë mbrojtje.

-         Duhet të mbani mend të shkoni çdo 12 javë në institucione shëndetësore për të marr injeksionin

-         Për shkak se Depo është një metodë afatgjate, nuk duhet ta përdorni atë nëse doni të mbesni shtatzënë brenda 18 muajve të ardhshëm.

-         Femrat me osteoporozë (densitet të ulët të kockave) apo me kocka të dobëta nuk duhet të përdorin Depo.

Efektiviteti

Injeksioni është 99% i sigurt nëse përdoret në mënyrë korrekte. Nëse 1000 femra marrin injeksion brenda 1 viti, vetëm 3 prej tyre kanë mundësi të mbeten shtatzënë. Nëse vonoheni të merrni injeksionin pas terminëve të caktuara, atëherë është më pak efektiv.

MBAJ MEND: Të përdorësh injeksionin në mënyrë të rregullt do të thotë ju duhet të merrni atë në terminët e caktuara (çdo 12 javë)

Mos harroni për Kontracepsionin Emergjent. Nëse keni harruar të merrni injeksionin dhe keni pasur marrëdhënie seksuale të pambrojtura ju mund të përdorni kontracepsionin emergjent për të parandaluar shtatzënësinë.

Shtatzënësia dhe Depo

Pasi të kenë ndërprerë përdorimin e Depo-s, disa femra kanë mundësi të mbesin shtatzënë menjëherë. Por, disa femrave iu duhen 3-18 muaj kohë që të kenë mundësi të mbeten shtatzënë. Nëse doni të mbesni shtatzënë brenda 18 muajve të ardhshëm mos përdorni depo, përdorni ndonjë metodë tjetër kontraceptive.

Nëse doni të mbesni shtatzënë menjëherë, fillo të marrësh acid folik - është gjëja më e mirë që mund të bësh për fëmiun tuaj të ardhshëm.

FAKT: Shumë femra mund të mbeten shtatzënë gjatë vitit të parë pasi të kenë ndaluar përdorimin e Depos dhe nuk kanë përdorur ndonjë metodë tjetër kontracepsioni.

Pyetjet më të shpeshta?

Çka ndodhë nëse vonohem për të marrë injeksionin?

Duhet të shkoni të merrni injeksionin sa më parë që është e mundur. Nëse vonoheni 1 javë e më shumë jeni në rrezik për të mbetur shtatzënë. Për të mbrojtur veten nga kjo, duhet të përdorni një metodë shtesë kontraceptive, p.sh. kondoma për 2 javë.

Çka nëse nuk me vjen një cikël?

Nëse e keni marr injeksionin me vonesë apo ka qenë injeksioni i parë, kontaktoni mjekun dhe bëni një test për shtatzënësi. Nëse e keni marr injeksionin me kohë, pothuajse nuk ka gjasa për të mbetur shtatzënë.

Mbani mend:

Nëse jeni duke përdorur injeksione përafërsisht q 1 vit, është normale që mund të mos vijnë menstruacionet.

A mund të ndryshojë Depo disponimin?

Progesteroni, hormoni femëror që gjendet në “injeksion”, mund të ndikoj në disponimin e disa femrave.

Nëse përdor Depo, a do më dobësohen kockat?

Studimet kanë treguar se Depo zvogëlon densitetin e kockave. Pas ndërprerjes së përdorimit të Depo-s, forca e kockave do të kthehet përsëri. Të gjitha femrat që përdorin Depo-n për më shumë se 18 muaj duhet të fillojnë të bëjnë ushtrime fizike rregullisht, përveç kësaj ato duhet të marrin kalcium në sasi të mjaftueshme dhe të ndalojnë pirjen e duhanit.

A është e dëmshme nëse më ndërpriten menstruacionet?

Jo! Nëse të ndërpriten menstruacionet për shkak të përdorimit të Depo-s nuk është e dëmshme për ju. Menstruacionet ndalojnë për shkak se vezoret (ovaret) kalojnë në një gjendje “pushimi” për shkak të veprimit të injeksionit. Pasi të kenë kuptuar këtë shumica e femrave ndjehen më mirë, madje disave ju pëlqen kjo.

......................................................................................

>> Për të shkarkuar në PDF format shko në:

http://www.shendetiriprodhues.org/broshurat/DEPO.pdf